الفنانة حلا شيحة تتبرأ من فيلمها وتطلب من تامر حسني التوبة
أعربت الفنانة المصرية حلا شيحة، صباح اليوم الخميس، عن غضبها من تصرف زميله الفنان تامر حسني، عقب طرحه أغنية “بحبك” من فيلم “مش أنا” على قناته على يوتيوب، والذي يتضمن مشاهد رومانسية تجمعه بها.
وكتبت حلا شيحة على صفحتها في موقع “إنستغرام” تدوينة طويلة، جاء فيها: "أنا اتفاجئت جدا بنزول كليب يجمع فيه مشاهد متفرقة من الفيلم و خصوصا بعد آخر بوست نزلته و وضحت فيه أنا إيه ..و اتفاجئت أكتر خصوصا بعد وعد تامر حسني ليا وتأكيده إنه حیحترم رغبتي و بعض الطلبات اللي طلبتها منه بكل احترام وود الصيف اللي فات وأکد لي إنه حيحترم رغبتي".
وأضافت شيحة: "إحنا يمكن نجحنا بمقاييس الدنيا بس صدقوني بمقاييس ربنا احنا لم ولن ننجح انا عارفة ومتأكدة إن زملائي جواهم خير بس للأسف فتنة الشهرة و النجاح مش بتخلينا نشوف ونقيس الأمور صح بتكلم من قلبي الكليب ده ميرضيش ربنا و أنا عيطت لأني شفت نفسي في المشاهد دي .. دي كانت زلة نتيجة ظروف مريت بيها و كلنا بنغلط و لازم نغلط علشان إحنا بشر بس المصيبة اننا بنغفل وبننسى".
وتابعت: "انا مش حتكسف من حد انا تبت من المشاهد دي و هي و هي لا تصح و انا غلطت و بصلح و اهم حاجة ان ربنا يرضى عني لان في الاخر ده اللي حينفعنا مش الشهرة و لا النجاح لا هو مش نجاح أصلا علشان النجاح الحقيقي حاجة تانية خالص احنا اغلبنا ناسينها الا القليلين منا الفن لو بيخلينا نبعد عن منهج ربنا و منبقاش قدوة لولادنا يبقي باطل و ميبقاش فن".
وأشارت في التدوينة إلى مقابلة كان تحدث فيه تامر حسني في بداياته وشاركت الفيديو الذي قال فيه "مش بتمنى أموت وأنا مطرب أنا خايف من كده.. مش علشان بعمل حاجة غلط، بس مش حاسه آخر الأحلام".
وعلقت على ذلك قائلة: "احنا كلنا عندنا امتحان في الدنيا دي وحابة افكرك بالفيديو ده يا تامر اللي قولت فيه انا مش بتمنى أموت وأنا مطرب انا دايماً خايف من كده.. كلام أكيد قولته في لحظة صدق جواك وجوانا كلنا، شوفه تاني يمكن يفكرك إن جواك أكيد في صراع وأنا وكلنا بنغلط بس المهم في الآخر نتدارك الغلط و نصلح.
وختمت بآية قرآنية: "إِلَّا مَن تَابَ وَآمَنَ وَعَمِلَ عَمَلًا صَالِحًا فَأُولَٰئِكَ يُبَدِّلُ اللَّهُ سَيِّئَاتِهِمْ حَسَنَاتٍ ۗ وَكَانَ اللَّهُ غَفُورًا رَّحِيمًا"، مضيفة "الله على كلام الله وجماله يا سلام لو أصواتنا ومواهبنا كلها نستعملها في الخير عشان يبقى فن بجد".
رد تامر حسني برسالة مطولة أكد فيها أنه متضايق وحزين لوصول الأمور والنقاش لهذا الشكل خاصة مع زميل يحترمه وبينهم كل خير، قائلا: “للتوضيح بما إنك يا حلا كتبتي بوست و أشركتي الجمهور الكريم معانا بدال ما كنتي تكلميني شخصياً و نتناقش بيني و بينك”.
وتابع: “فا أنا مضطر أرد هنا برضه.. أولاً أنا عمري ما وعدتك إن الكليب مش هينزل دا محصلش أصلا يا حلا مش أنا خالص اللي أوعد و أخلف….. الحقيقه اني إحترمت كلامي معاكي و وعدتك أشيل مشاهد تانيه طلبتيها و شيلتها بالفعل و شكرتيني عليها و لو حابه تفتكري المشاهد اللي اتشالت بعد اذنك روحي شوفيها في المونتاچ عند الأستاذ عمرو عاكف او كلميه يبعتهالك كلها موجوده”.
وأضاف: " الفيلم بقاله ٣ اسابيع في السينمات و الكليب موجود جوه الفيلم هو بالنسبالك الحرام إننا ننزل الكليب على اليوتيوب بس !! إنما الكليب يتشاف جوه السينمات عادي ؟؟؟؟ منطق غريب فعلاً يا حلا ، و بعدين هو مش أنتي اللي مضيتي عقد و تقاضيتي عليه مبلغ كبير عشان الدور دا بعينه !!!!! هو مش إنتي اللي صورتيه و مثلتيه بنفسك و بمنتهى الرضا ولاّ حد أجبرك ؟!!!!!! ".
وكانت حلا شيحة قد شاركت في يونيو الماضي صورة مع زوجها الداعية الإسلامي معز مسعود، وعلقت على الصورة بأن فيلم "مش أنا" الذي تم تصويره منذ أكثر من سنة ونصف، لم يعد يمثلها، وهي "فعلاً مش أنا" في الفيلم.
